అక్షరటుడే వెబ్డెస్క్: Karimnagar ACB Raid | అవినీతి అధికారుల ఆటకట్టించేందుకు ఏసీబీ (అవినీతి నిరోధక శాఖ) అధికారులు మరో విజయవంతమైన భారీ ఆపరేషన్ నిర్వహించారు. కరీంనగర్ జిల్లా( Karimnagar ) సైదాపూర్ మండల్ సర్వేయర్తో పాటు ఆయన వద్ద ప్రైవేట్ అసిస్టెంట్లుగా పనిచేస్తున్న మరో ఇద్దరిని లంచం తీసుకుంటుండగా ఏసీబీ అధికారులు శుక్రవారం (జూన్ 5, 2026) రెడ్ హ్యాండెడ్గా పట్టుకున్నారు.
Karimnagar ACB Raid | అసలేం జరిగిందంటే?
ఏసీబీ అధికారుల వివరాల ప్రకారం.. సైదాపూర్ మండలానికి చెందిన సర్వేయర్ ఎక్కలదేవి కుమారస్వామి (29) వద్దకు అమ్మనగుర్తి గ్రామానికి చెందిన ఓ బాధితుడు తన భూమిని సర్వే చేయాల్సిందిగా ఆశ్రయించాడు. ఈ అధికారిక పనిని పూర్తి చేయడానికి సర్వేయర్ కుమారస్వామి బాధితుడి నుండి ఏకంగా రూ. 25,000 లంచం డిమాండ్ చేశాడు. ఇందులో భాగంగా గత నెల మే 23న యూపీఐ (UPI/గూగుల్ పే) ట్రాన్సాక్షన్ ద్వారా రూ. 5,000, ఆ తర్వాత జూన్ 2వ తేదీన ప్రైవేట్ అసిస్టెంట్ వంగ విహిత్ రెడ్డి (A-3) ద్వారా రూ. 10,000 నగదును అడ్వాన్స్గా తీసుకున్నాడు.
Karimnagar ACB Raid | రెడ్ హ్యాండెడ్గా..
ఇక మిగిలిన రూ. 10,000 లంచం మొత్తాన్ని శుక్రవారం రోజు మరో ప్రైవేట్ అసిస్టెంట్ తీగల రాజేష్ (A-2) ద్వారా తీసుకుంటుండగా కరీంనగర్ రేంజ్ ఏసీబీ అధికారులు రంగంలోకి దిగి రెడ్ హ్యాండెడ్గా పట్టుకున్నారు. రాజేష్ వద్ద నుంచి లంచం సొమ్ము రూ. 10,000 రికవరీ చేసుకున్నారు. విధుల్లో తీవ్ర అవినీతికి, అక్రమాలకు పాల్పడినందుకు గానూ మండల్ సర్వేయర్ కుమారస్వామి (A-1)తో పాటు ప్రైవేట్ అసిస్టెంట్లు తీగల రాజేష్ (A-2), వంగ విహిత్ రెడ్డి (A-3)లను ఏసీబీ అధికారులు అరెస్ట్ చేశారు. నిందితులను కరీంనగర్లోని స్పెషల్ జడ్జ్ ఫర్ SPE & ACB కోర్టులో హాజరుపరచనున్నారు. భద్రతా కారణాల దృష్ట్యా బాధితుడి వివరాలను గోప్యంగా ఉంచినట్లు అధికారులు తెలిపారు.
Karimnagar ACB Raid | లంచం అడిగితే వీరికి ఫిర్యాదు చేయండి..
ప్రభుత్వ అధికారులు ఎవరైనా లంచం డిమాండ్ చేస్తే భయపడకుండా ఏసీబీ టోల్ ఫ్రీ నెంబర్ 1064 కు సంప్రదించాలని అధికారులు ప్రజలను కోరారు. అలాగే వాట్సాప్ (9440446106), ఫేస్బుక్ (Telangana ACB), ఎక్స్/ట్విట్టర్ (@TelanganaACB) సామాజిక మాధ్యమాల ద్వారా కూడా ఫిర్యాదు చేయవచ్చని, బాధితుల వివరాలు పూర్తిగా రహస్యంగా ఉంటాయని ఏసీబీ పీఆర్వో స్పష్టం చేశారు.
ఇది కూడా చదవండి: Municipal Meeting | రసాభాసగా కామారెడ్డి బల్దియా సమావేశం.. మధ్యలోనే వెళ్లిపోయిన ఛైర్మన్..
