Cockroach Janata Party Protest | జెండా పట్టుకున్నందుకు జైలుకా?.. కేంద్రం తీరుపై అభిజిత్ దీప్కే తీవ్ర ఆగ్రహం

అక్షరటుడే వెబ్‌డెస్క్: Cockroach Janata Party Protest | దేశంలో మోదీ ప్రభుత్వం ప్రజాస్వామ్య హక్కులను కాలరాస్తూ అప్రకటిత ఎమర్జెన్సీని నడుపుతోందని కాక్రోచ్ జనతా పార్టీ (CJP) వ్యవస్థాపకుడు అభిజిత్ దీప్కే తీవ్ర స్థాయిలో విరుచుకుపడ్డారు. ఢిల్లీలోని జంతర్ మంతర్ వద్ద శాంతియుతంగా ప్రదర్శన నిర్వహించిన తమ పార్టీ కీలక నేతలు సౌరభ్ దాస్, ఆశుతోష్ రాంకా, అజింక్యా షిండేలను పోలీసులు అరెస్ట్ చేసి, కోర్టు ఐదు రోజుల జ్యుడీషియల్ కస్టడీకి పంపడంపై ఆయన తీవ్ర ఆగ్రహం వ్యక్తం చేశారు. కేంద్రంలో అధికారంలో ఉన్న ప్రభుత్వం పోలీసుల వెనుక దాక్కుంటూ పిరికిపంద రాజకీయాలు చేస్తోందని మండిపడ్డారు.

Cockroach Janata Party Protest | దాక్కుంటున్న పిరికి ప్రభుత్వం..

నాగ్‌పూర్‌లో ఏర్పాటు చేసిన విలేకరుల సమావేశంలో మాట్లాడిన అభిజిత్ దీప్కే.. కేంద్ర ప్రభుత్వ తీరుపై నిప్పులు చెరిగారు. దేశంలో నిజంగానే ఎమర్జెన్సీ విధించాలనుకుంటే ప్రధాని నరేంద్ర మోదీ ధైర్యంగా అధికారికంగా ప్రకటించాలని సవాల్ విసిరారు. ఢిల్లీ జంతర్ మంతర్ వద్ద కేవలం జాతీయ జెండాను చేతపట్టుకుని ప్రదర్శన నిర్వహించినంత మాత్రానికే నేతలను అరెస్ట్ చేసి ఐదు రోజుల కస్టడీకి పంపడం ఏ రకమైన పాలన అని నిలదీశారు. అరెస్ట్ చేసిన సమయం నుంచి నేతలను చట్టవిరుద్ధంగా నిర్బంధించారని, కనీసం వారి తరఫు న్యాయవాదులను కూడా కలవనివ్వకుండా ప్రాథమిక హక్కులను కాలరాస్తున్నారని ఆరోపించారు.

Cockroach Janata Party Protest | ఉమ్మడి పోరాటం..

ఇదే సమయంలో ప్రతిపక్షాల ‘ఇండీ’ (INDIA) కూటమి చేపడుతున్న నిరసనలకు తమ మద్దతు ఉంటుందని అభిజిత్ దీప్కే స్పష్టం చేశారు. తామంతా ఒకే ప్రధాన లక్ష్యం కోసం పోరాడుతున్నామని వివరిస్తూ.. కేంద్రంలో మోదీ  ( Narendra Modi )ప్రభుత్వం మళ్లీ అధికారంలోకి వచ్చేందుకు పరోక్షంగా సహాయపడుతున్నారంటూ ప్రధాన ఎన్నికల కమిషనర్ (CEC) జ్ఞానేష్ కుమార్‌కు వ్యతిరేకంగా ఈ ప్రజాస్వామ్య పోరాటం కొనసాగుతుందని తేల్చిచెప్పారు.

Cockroach Janata Party Protest | అమిత్ షాకు సవాల్..

అలాగే కాక్రోచ్ జనతా పార్టీపై వస్తున్న విదేశీ నిధుల ఆరోపణలపై కేంద్ర హోంమంత్రి అమిత్ షాకు అభిజిత్ దీప్కే ఘాటు సవాల్ విసిరారు. తమది ప్రజల తరఫున నిలబడే ఒక స్వతంత్ర ఒత్తిడి సమూహమని, తమకు విదేశాల నుంచి నిధులు వస్తున్నాయంటూ ప్రభుత్వం చేస్తున్న ఆరోపణల్లో ఏమాత్రం వాస్తవం లేదని ఖండించారు. ధైర్యముంటే హోంమంత్రి దీనిపై పూర్తిస్థాయి దర్యాప్తు జరిపించి ఆధారాలను బహిర్గతం చేయాలని డిమాండ్ చేశారు. రాజ్యాంగం, ప్రజాస్వామ్యం, పౌరుల ఓటు హక్కు పరిరక్షణ కోసమే తమ పోరాటం నిరంతరం కొనసాగుతుందని ఆయన స్పష్టం చేశారు.

ఇది కూడా చదవండి:  CJP Leaders | సీజేపీ నాయకులకు 5 రోజుల జైలు శిక్ష