అక్షరటుడే, గాంధారి: Bank Account Freeze | పంట రుణం బకాయి ఉందంటూ మహిళా రైతు సేవింగ్స్ ఖాతాను బ్యాంకు ఫ్రీజ్ చేసింది. ఖాతా ఫ్రీజ్ చేయడంతో, ప్రభుత్వ పథకాల నగదు తీసుకోలేక ఆ మహిళా రైతు ఆందోళన వ్యక్తం చేస్తోంది. ఈ ఘటన గాంధారి మండలం (Gandhari Mandal)లో చోటుచేసుకుంది.
Bank Account Freeze | పెద్ద పోతంగల్ కెనరా బ్యాంక్లో..
మండలంలోని పెద్ద పోతంగల్ కెనరా బ్యాంకులో నాగులూర్ గ్రామానికి చెందిన మహిళా రైతు ఖాట్మండీ లక్ష్మీబాయికి సేవింగ్స్ ఖాతా ఉంది. తనకు పంట రుణం బకాయి ఉన్న మాట వాస్తవమేనని, అయితే ఎలాంటి ముందస్తు నోటీసు ఇవ్వకుండా తన సేవింగ్స్ ఖాతాను ఫ్రీజ్ చేయడం సరికాదని బాధితురాలు ఆవేదన వ్యక్తం చేసింది. పంట రుణ ఖాతా వేరు, వ్యక్తిగత సేవింగ్స్ ఖాతా వేరు అని లక్ష్మీబాయి స్పష్టం చేశారు. అయితే పీఎం కిసాన్, రైతు భరోసా వంటి ప్రభుత్వ పథకాల నిధులు వచ్చే సేవింగ్స్ ఖాతాను అధికారులు ఫ్రీజ్ చేయడంతో చేతికి అందక ఇబ్బందులు పడుతున్నట్లు తెలిపారు.
Bank Account Freeze | వినతిపత్రం నిరాకరణ..
తనకు తెలియకుండానే ఆధార్తో అనుసంధానమైన మొబైల్ నంబర్ను తొలగించారని బాధితురాలు ఆరోపించారు. ఖాతాను యథావిధిగా కొనసాగించాలని, ఆధార్, మొబైల్ నంబర్ లింక్ చేయాలని కోరుతూ వినతిపత్రం, పాస్బుక్, ఆధార్, పాన్ కార్డు జిరాక్స్ కాపీలు ఇచ్చేందుకు వెళ్లినా మేనేజర్ తీసుకోవడానికి నిరాకరించారని పేర్కొన్నారు. ఖాతా పునరుద్ధరణ కోసం పలుమార్లు బ్యాంకు చుట్టూ తిరగడంతో విసుగు చెందిన మేనేజర్ స్థానిక పోలీస్ స్టేషన్కు వెళ్లి ఎస్సైకి విషయం వివరించారు. దీంతో ఎస్సై బాధితురాలిని పిలిచి మాట్లాడి సముదాయించారు. ఉన్నతాధికారులకు వినతిపత్రం పంపితే సమస్య పరిష్కారమవుతుందని చెప్పినా, మేనేజర్ మాత్రం వినతిపత్రం స్వీకరించలేదని బాధితురాలు వాపోయారు. ఈ విషయంపై స్థానిక ఎస్సై మహేందర్ను ఫోన్లో సంప్రదించేందుకు ప్రయత్నించగా స్పందన లేదని తెలిపారు. ఇప్పటికైనా ఉన్నతాధికారులు స్పందించి తన సేవింగ్స్ ఖాతాపై ఉన్న ఫ్రీజ్ ఎత్తివేసి, ప్రభుత్వ పథకాల డబ్బులు తీసుకునేలా చర్యలు తీసుకోవాలని లక్ష్మీబాయి కోరారు.
ఇది కూడా చదవండి..: Indiramma Towers Scheme | ‘ఇందిరమ్మ టవర్స్’లో గృహయోగం.. ఇందూరులో జోరుగా దరఖాస్తుల సమర్పణ..