Kamareddy ATM Robbery Case | రాజస్థాన్​లో చిక్కిన ఏటీఎం చోరీ ముఠా సభ్యుడు.. కొనసాగుతున్న సెర్చ్​ ఆపరేషన్​

అక్షరటుడే, కామారెడ్డి: Kamareddy ATM Robbery Case | గాంధారి ఎస్​బీఐ ఏటీఎం చోరీ కేసులో పోలీసులు కీలక పురోగతి సాధించారు. అంతర్రాష్ట్ర ఏటీఎం చోరీ ముఠా గుట్టురట్టు చేసి రాజస్థాన్​లో ప్రధాన నిందితుడిని పట్టుకున్నారు.

Kamareddy ATM Robbery Case | గాంధారి మండల కేంద్రంలో..

జిల్లా పోలీసు కార్యాలయంలో కేసుకు సంబంధించిన వివరాలను ఎస్పీ రాజేష్ చంద్ర (SP Rajesh Chandra) సోమవారం మీడియాకు వివరించారు. ఈనెల 10 న అర్ధరాత్రి సమయంలో గాంధారి గ్రామంలోని ప్రధాన రహదారి పక్కన ఉన్న ఎస్​బీఐ ఏటీఎం వద్ద గుర్తు తెలియని వ్యక్తులు నైటీలు ధరించి గ్యాస్ కట్టర్ సాయంతో ఏటీఎం యంత్రాన్ని ధ్వంసం చేశారు. నగదుతో ఉన్న ఐదు బాక్సులను అపహరించారు. ఈ ఘటనలో మొత్తం రూ.25,45,900 నగదు చోరీకి గురైనట్టుగా బ్యాంకు ప్రతినిధి ఫిర్యాదు చేయగా గాంధారి పోలీస్ స్టేషన్​లో కేసు నమోదు చేసి దర్యాప్తు ప్రారంభించారు.

Kamareddy ATM Robbery Case | కరీంనగర్​లోనూ !

సెప్టెంబర్ 2026లో కరీంనగర్​లోని రెండు ఎస్​బీఐ ఏటీఎంల వద్ద కూడా ఇదే ముఠా గ్యాస్ కట్టర్​తో చోరీలకు పాల్పడినట్టుగా తేలింది. ఈనెల 10న రాత్రి నిందితులు మరోసారి తెలంగాణకు వచ్చి గాంధారికి వచ్చే మార్గంలో ఒక వెల్డింగ్ షాప్ తాళం పగలగొట్టి సిలిండర్​తో పాటు నేరానికి ఉపయోగపడే పరికరాలను దొంగిలించారు. అనంతరం ఏటీఎం వద్దకు చేరుకుని మాస్కులు, క్యాప్​లు, నైటీలు ధరించి, సీసీ టీవీ కెమరాలపై బ్లాక్ స్ప్రే వాడి గ్యాస్ కట్టర్​ తో ఏటీఎంను ధ్వంసం చేశారు. నగదును స్కార్పియోలో వేసుకుని పరారయ్యారు. చోరీ అనంతరం నిందితులు మహారాష్ట్ర, రాజస్థాన్ వైపు వెళ్తున్నట్టుగా గుర్తించిన కామారెడ్డి పోలీసులు సంబంధిత రాష్ట్ర పోలీసులకు సమాచారం అందించారు. రాజస్థాన్​లోని చేచాట్ పోలీసులు వాహనాన్ని అడ్డుకునేందుకు ప్రయత్నించగా టైరు దెబ్బతినడంతో నిందితులు వాహనాన్ని వదిలిపెట్టి నగదు బ్యాగుతో పరారయ్యారు.

Kamareddy ATM Robbery Case | ​లో ప్రత్యేక బృందాలతో..

ప్రత్యేక బృందాలు రాజస్థాన్ చేరుకుని ఈ నేక 20న సాయంత్రం సమయంలో బరోడామేవ్ సమీపంలో భరత్పూర్ రోడ్డుపై బస్సు కోసం వేచి ఉన్న రాజస్థాన్​కు చెందిన రషీద్​ను అదుపులోకి తీసుకున్నారు. అతని వద్ద నుంచి రూ.29,400, మొబైల్ ఫోన్లు 2, చోరీకి వాడిన స్కార్పియో వాహనం, గ్యాస్ కట్టింగ్ పరికరాలు, వివిధ నంబర్లు గల నంబర్ ప్లేట్లు, మాస్కులు, 3 ఇనుప కత్తులు, 1 ఇనుప రాడ్ స్వాధీనం చేసుకున్నారు. రషీద్​ను కోర్టులో పరుపరుస్తామని పరారీలో ఉన్న నిందితులను త్వరలో పట్టుకుంటామని ఎస్పీ వెల్లడించారు. కేసును ఛేదించడంలో చాకచక్యంగా వ్యవహరించిన ఎల్లారెడ్డి డీఎస్పీ శ్రీనివాసరావు, సీసీఎస్ సీఐ సంతోష్ కుమార్, ఎస్సైలు ఆంజనేయులు, పుష్పరాజ్​తో పాటు ఇతర సిబ్బందిని ఎస్పీ అభినందించారు.

ఇది కూడా చదవండి..: Nizamabad Gambling Raid | పేకాట స్థావరంపై పోలీసుల దాడి..