అక్షరటుడే, నిజామాబాద్ సిటీ: Lal Bahadur Shastri | మాజీ ప్రధాని లాల్బహదూర్ శాస్త్రి, మహాత్మ గాంధీ ఆశయాలు నేటి తరానికి స్ఫూర్తిదాయకమని అర్బన్ మాజీ ఎమ్మెల్యే బిగాల గణేష్ గుప్తా (Bigala Ganesh Gupta) పేర్కొన్నారు. లాల్ బహదూర్ శాస్త్రి, గాంధీ జయంతి సందర్భంగా వారి విగ్రహాలకు ఘనంగా నివాళులు అర్పించారు.
Lal Bahadur Shastri | ఐక్యతా భావాన్ని పెంపొందిస్తూ..
గణేష్ బిగాల మాట్లాడుతూ.. దేశం కోసం లాల్ బహదూర్ శాస్త్రి చేసిన సేవలు, ఆయన చూపిన నిజాయితీ, నిరాడంబరత, దేశభక్తి నేటి తరానికి ఆదర్శంగా నిలుస్తాయని అన్నారు. దేశ ప్రజల్లో ఐక్యతా భావాన్ని పెంపొందిస్తూ, దేశ అభివృద్ధి కోసం ఆయన చేసిన కృషి చిరస్మరణీయమని పేర్కొన్నారు. ‘జై జవాన్.. జై కిసాన్’ నినాదంతో దేశ రక్షణలో సైనికుల పాత్రను, దేశ ఆహార భద్రతలో రైతుల ప్రాధాన్యతను శాస్త్రి గారు చాటి చెప్పారని గణేష్ బిగాల అన్నారు. అలాగే మహాత్మా గాంధీ చూపిన సత్యం, అహింస, శాంతి, సహనం, సేవామార్గాలు నేటి సమాజానికి స్ఫూర్తిదాయకమని అన్నారు.
దేశ స్వాతంత్య్రం కోసం గాంధీజీ చేసిన త్యాగాలు, ప్రజలను ఏకతాటిపైకి తీసుకువచ్చిన ఆయన నాయకత్వం భారత చరిత్రలో చిరస్మరణీయమని పేర్కొన్నారు. ఈ కార్యక్రమంలో మాజీ మేయర్ దండు నీతు కిరణ్ శేఖర్, నగర అధ్యక్షుడు సిర్ప రాజు, మాజీ నుడా ఛైర్మన్ ప్రభాకర్ రెడ్డి, సత్య ప్రకాష్, సుజిత్ సింగ్, జగత్ రెడ్డి, గాండ్ల లింగం, చింతకాయల రాజు తదితరులు పాల్గొన్నారు.
ఇది కూడా చదవండి..: Kamareddy Municipality Vigilance | కామారెడ్డి బల్దియాలో విజిలెన్స్ విచారణ..
