అక్షరటుడే, వెబ్డెస్క్: Paytm Wallet Services | ప్రముఖ ఫిన్‌టెక్ దిగ్గజం పేటీఎం (Paytm) మాతృసంస్థ వన్‌97 కమ్యూనికేషన్స్‌కు రిజర్వ్ బ్యాంక్ ఆఫ్ ఇండియా (RBI) నుంచి భారీ ఊరట లభించింది.
దేశవ్యాప్తంగా డిజిటల్ వాలెట్ సేవలను తిరిగి ప్రారంభించేందుకు వీలుగా, పేటీఎం అనుబంధ సంస్థ అయిన పేటీఎం పేమెంట్స్ సర్వీసెస్ లిమిటెడ్ (PPSL)కు ఆర్‌బీఐ సూత్రప్రాయ అనుమతులు (In-principle approval) మంజూరు చేసింది. ఈ మేరకు నవంబర్ 13న ఆర్‌బీఐ నుంచి అధికారిక లేఖ అందినట్లు వన్‌97 కమ్యూనికేషన్స్ స్టాక్ ఎక్స్ఛేంజీలకు వెల్లడించింది.
Paytm Wallet Services | ఆరు నెలల గడువు
ప్రీపెయిడ్ పేమెంట్ ఇన్‌స్ట్రుమెంట్స్ (PPIs) అంటే డిజిటల్ వాలెట్లు, ప్రీపెయిడ్ కార్డులను జారీ చేసేందుకు పేమెంట్ అండ్ సెటిల్‌మెంట్ సిస్టమ్స్ యాక్ట్-2007 కింద ఈ ప్రాథమిక ఆమోదం లభించింది. అయితే, ఈ అనుమతితో వెంటనే వాలెట్ సేవలు అందుబాటులోకి రావు. ఆర్‌బీఐ నిబంధనల ప్రకారం PPSL కొన్ని కీలక షరతులను పూర్తి చేయాల్సి ఉంటుంది. అవి ఏమిటంటే..
సిస్టం & సైబర్ సెక్యూరిటీ ఆడిట్: CERT-In గుర్తింపు పొందిన ఆడిటర్ ద్వారా సమగ్ర సిస్టం ఆడిట్ మరియు సైబర్ సెక్యూరిటీ ఆడిట్ నిర్వహించాలి.
గడువు: అనుమతి లభించిన నాటి నుంచి ఆరు నెలల్లోగా ఈ ఆడిట్ నివేదికను ఆర్‌బీఐకి సమర్పించాలి. గడువులోగా నివేదిక ఇవ్వకపోతే ఈ సూత్రప్రాయ అనుమతి దానంతట అదే రద్దవుతుంది.
ఆడిట్ నివేదికను పరిశీలించి, ఆర్‌బీఐ తుది అనుమతి (Certificate of Authorisation) జారీ చేసిన తర్వాతే వినియోగదారులకు పూర్తిస్థాయిలో వాలెట్ సేవలు ప్రారంభమవుతాయి.
Paytm Wallet Services | ఆంక్షల నుంచి పునరుజ్జీవం దిశగా..
2014లో వాలెట్ వ్యాపారాన్ని ప్రారంభించిన పేటీఎం, 2017లో దానిని పేటీఎం పేమెంట్స్ బ్యాంక్ (PPBL)కు బదిలీ చేసింది. అయితే, నిబంధనల ఉల్లంఘన కారణంగా 2024 జనవరి 31న PPBLపై ఆర్‌బీఐ కఠిన ఆంక్షలు విధించగా, తదుపరి 2026 ఏప్రిల్ 24న దాని బ్యాంకింగ్ లైసెన్సును పూర్తిగా రద్దు చేసింది.
దీంతో పేటీఎం వాలెట్ సేవలకు బ్రేక్ పడింది. ఇప్పుడు పేమెంట్స్ బ్యాంకుతో సంబంధం లేకుండా, పూర్తిగా వన్‌97 కమ్యూనికేషన్స్ ఆధ్వర్యంలోని మరో అనుబంధ సంస్థ (PPSL) ద్వారా వాలెట్ వ్యాపారాన్ని తిరిగి పట్టాలెక్కించేందుకు పేటీఎం సిద్ధమైంది.
Paytm Wallet Services | రికార్డు స్థాయికి షేర్లు!
ఆర్‌బీఐ నుంచి సానుకూల ప్రకటన వెలువడటంతో స్టాక్ మార్కెట్లో పేటీఎం షేర్లు దూసుకెళ్లాయి. మదుపర్ల కొనుగోళ్ల మద్దతుతో వన్‌97 కమ్యూనికేషన్స్ షేరు ధర ఇంట్రాడేలో రూ. 1,960 మార్కును తాకి సరికొత్త రికార్డును నమోదు చేసింది.
వాలెట్ సేవలు తిరిగి ప్రారంభమైతే వినియోగదారులకు మరిన్ని చెల్లింపుల ఆప్షన్లు అందుబాటులోకి రావడంతో పాటు, కంపెనీ వ్యాపార వృద్ధికి మరింత బలం చేకూరనుందని మార్కెట్ విశ్లేషకులు భావిస్తున్నారు.
Akshara Today | ప్రజల గొంతుకగా అక్షరటుడే.. డిజిటల్ దిశగా మరో అడుగు..
