అక్షరటుడే, వెబ్డెస్క్: Sonia Gandhi Biopic Film | తెలంగాణ Telangana రాజకీయ రంగంలో ఎప్పుడూ తన మార్కు నిర్ణయాలతో, సంచలన వ్యాఖ్యలతో వార్తల్లో నిలిచే టీపీసీసీ వర్కింగ్ ప్రెసిడెంట్, సంగారెడ్డి మాజీ ఎమ్మెల్యే తూర్పు జగ్గారెడ్డి మరో ఆసక్తికర ప్రకటనతో రాజకీయ, సినీ వర్గాల్లో తీవ్ర చర్చకు తెరలేపారు.
కాంగ్రెస్ పార్టీ అగ్రనేత సోనియా గాంధీ ఇటీవల రాసిన ఆత్మకథ ‘బీలాంగింగ్: ఏ జర్నీ ఆఫ్ లవ్’ (Belonging: A Journey of Love) ఆధారంగా తెలుగులో బయోపిక్ నిర్మాణానికి శ్రీకారం చుడుతున్నట్లు ఆయన ప్రకటించారు.
సంగారెడ్డి నియోజకవర్గ కాంగ్రెస్ కార్యకర్తల సమావేశంలో పాల్గొన్న జగ్గారెడ్డి, ఈ వెండితెర ప్రాజెక్ట్‌కు సంబంధించిన వివరాలను పంచుకుంటూ నాయకులు, కార్యకర్తలలో సరికొత్త ఉత్సాహాన్ని నింపారు.
Sonia Gandhi Biopic Film | ప్రపంచానికి చాటేలా
ఇందిరా గాంధీ కోడలిగా, రాజీవ్ గాంధీ భార్యగా, రాహుల్, ప్రియాంక గాంధీలకు తల్లిగా సోనియా గాంధీ సాగించిన జీవిత ప్రయాణం సాధారణమైనది కాదని జగ్గారెడ్డి పేర్కొన్నారు. స్వయంగా అత్తను, భర్తను కోల్పోయి దేశం కోసం ప్రాణత్యాగాలు చేసిన కుటుంబం నుంచి వచ్చిన సోనియా గాంధీ నిజమైన త్యాగనిరతిని తెలుగు ప్రజల ముందుకు తెచ్చేందుకే ఈ సినిమాను నిర్మిస్తున్నామని స్పష్టం చేశారు.
Sonia Gandhi Biopic Film | ప్రధాని పీఠాన్ని తృణప్రాయంగా విడిచిన తీరు
సోనియా గాంధీకి ఏనాడూ అధికార తృష్ణ, ప్రధాని కుర్చీపై వ్యామోహం లేదని జగ్గారెడ్డి ఉద్ఘాటించారు. 1991లో రాజీవ్ గాంధీ మరణానంతరం ప్రధాని అయ్యే అవకాశం ఉన్నప్పటికీ పీవీ నరసింహారావును, 2004లో యూపీఏ (UPA) అధికారంలోకి వచ్చినప్పుడు సర్వత్ర మద్దతు లభించినా డాక్టర్ మన్మోహన్ సింగ్‌ను ప్రధాని పీఠంపై కూర్చోబెట్టిన చారిత్రాత్మక ఘట్టాలను ఈ సినిమాలో ప్రధానంగా ఆవిష్కరించనున్నట్లు తెలిపారు.
Sonia Gandhi Biopic Film | కార్యకర్తలే నిర్మాతలు
ఈ సినిమా నిర్మాణానికి సంగారెడ్డి నియోజకవర్గానికి చెందిన కాంగ్రెస్ నాయకులు, కార్యకర్తలే నిర్మాతలుగా వ్యవహరిస్తారని జగ్గారెడ్డి సంచలన పిలుపునిచ్చారు. నాయకులు ఇందుకోసం నిధులు సిద్ధం చేసుకోవాలని, త్వరలోనే 50 మంది సభ్యులతో ప్రత్యేక కమిటీని ఏర్పాటు చేసి సినిమా నిర్మాణ ప్రక్రియను వేగవంతం చేస్తామని ప్రకటించారు.
Sonia Gandhi Biopic Film | రేవంత్ రెడ్డి, మహేష్ గౌడ్ చేతుల మీదుగా ముహూర్తం
ఈ డ్రీమ్ ప్రాజెక్ట్ షూటింగ్‌ను తెలంగాణ ముఖ్యమంత్రి ఎనుముల రేవంత్ రెడ్డి, టీపీసీసీ అధ్యక్షుడు బి. మహేష్ కుమార్ గౌడ్ ముహూర్తపు ఘట్టంతో ప్రారంభించేలా ప్రణాళిక రూపొందిస్తున్నట్లు పేర్కొన్నారు.
జగ్గారెడ్డి వ్యూహం వెనుక పొలిటికల్ మైలేజ్!
రాజకీయ విశ్లేషకుల ప్రకారం… జగ్గారెడ్డి తీసుకున్న ఈ నిర్ణయం వెనుక కేవలం సినీ అభిమానమే కాదు, పక్కా రాజకీయ వ్యూహం కూడా కనిపిస్తోంది.
అధినాయకత్వానికి, ముఖ్యంగా గాంధీ కుటుంబానికి తనపై ఉన్న నమ్మకాన్ని బలపరుచుకోవడంతో పాటు, పార్టీ కేడర్‌లో సోనియా గాంధీ పట్ల ఉన్న సెంటిమెంట్‌ను తిరిగి రగిల్చే ప్రయత్నం చేస్తున్నట్లు తెలుస్తోంది.
దీనికితోడు సోనియా గాంధీ జీవిత త్యాగాలను ప్రజలకు వివరించడం ద్వారా, రాహుల్ గాంధీకి దేశవ్యాప్తంగా వస్తున్న మద్దతుకు తెలుగు రాష్ట్రాల నుంచి భావోద్వేగపూరితమైన తోడ్పాటు అందించాలని చూస్తున్నారు.
మరో కీలక అంశం ఏమిటంటే.. ఎన్నికల తరహాలోనే సొంత నిధులతో సినిమా నిర్మించడం ద్వారా నియోజకవర్గ నాయకులను, కార్యకర్తలను ఒకే వేదికపై భాగస్వాములను చేయాలని ప్రయత్నిస్తున్నారు.
మొత్తానికి, ‘బీలాంగింగ్: ఏ జర్నీ ఆఫ్ లవ్’ పుస్తకం వెండితెర రూపం దాల్చితే, అది తెలుగు రాజకీయాల్లోనే కాకుండా కాంగ్రెస్ శ్రేణుల్లో పెద్ద ఎత్తున పొలిటికల్ మైలేజ్ సాధించే అవకాశాలు ఉన్నాయి!
Akshara Today | ప్రజల గొంతుకగా అక్షరటుడే.. డిజిటల్ దిశగా మరో అడుగు..
