అక్షరటుడే, వెబ్డెస్క్: Farmhouse Politics | రాష్ట్రంలో ఫామ్హౌస్ రాజకీయాలు హాట్ టాపిక్గా మారాయి. బీఆర్ఎస్ నేతలు భూ కబ్జాలకు పాల్పడ్డారని ఆరోపిస్తూ.. వారి ఫామ్హౌస్లను కాంగ్రెస్ నాయకులు సందర్శిస్తున్నారు.
ఎర్రవల్లిలో కేసీఆర్ (KCR) ప్రభుత్వ భూములను ఆక్రమించారని ఇటీవల సీఎం ఆరోపించిన విషయం తెలిసిందే. ఆయన ఆదేశాల మేరకు అధికారులు ఆ గ్రామంలో సర్వే చేస్తున్నారు. మరోవైపు కాంగ్రెస్ ఎంపీలు, ఎమ్మెల్సీలు, ఎమ్మెల్యేలు ఇతర బీఆర్ఎస్ నాయకుల ఫామ్హౌస్లను సందర్శిస్తుండటం గమనార్హం. జన్వాడలోని కేటీఆర్ ఫామ్హౌస్, మొయినాబాద్, అజీజ్నగర్లోని ఇతర నేతల పామ్హౌస్లను వారు సందర్శించారు. తాజాగా సూర్యాపేట ఎమ్మెల్యే జగదీశ్రెడ్డి ఫామ్హౌస్ సందర్శనకు వెళ్లారు. దీంతో అక్కడ భారీగా పోలీసులు మోహరించారు.
Farmhouse Politics | చర్యలు కరువు
కాంగ్రెస్ ప్రజాప్రతినిధులు పామ్హౌస్లను సందర్శించడంపై తీవ్ర విమర్శలు వస్తున్నాయి. అసైన్డ్, ప్రభుత్వ భూములు, ఎఫ్టీఎల్ పరిధిలో వాటిని నిర్మించారని కాంగ్రెస్ నేతలు ఆరోపిస్తున్నారు. అయితే రాష్ట్రంలో కాంగ్రెస్ అధికారంలో ఉంది. ఒకవేళ వారు చట్ట విరుద్ధంగా నిర్మాణాలు చేపడితే కూల్చి వేయొచ్చు. అలా కాకుండా సందర్శనల పేరిట రాజకీయాలు చేస్తుండటంపై నెటిజన్లు విమర్శలు చేస్తున్నారు.
Farmhouse Politics | సామాన్యులపై ప్రతాపం
హైదరాబాద్ నగరంలో హైడ్రా అనేక నిర్మాణాలను కూల్చి వేసింది. ఇందులో పేదలకు చెందిన ఇళ్లు వేలల్లో ఉన్నాయి. నిబంధనలు పాటించలేదని, ఎఫ్టీఎల్, బఫర్ జోన్లో నిర్మించారని అనేక ఇళ్లను హైడ్రా అధికారులు కూల్చివేశారు. అంతేగాకుండా ఖమ్మం వెలుగుమట్లలో సైతం పేదల గుడిసెలను తొలగించారు. పేదల విషయంలో మాత్రం వేగంగా చర్యలు చేపడుతున్నా ప్రభుత్వం.. పెద్దల జోలికి ఎందుకు వెళ్లడం లేదన్న అనుమానాలు వ్యక్తం అవుతున్నాయి. ఒకవేళ బీఆర్ఎస్ నాయకులు నిజంగా తప్పు చేసి ఉంటే వాటిని కూల్చివేయాలని ప్రజలు అంటున్నారు. అలా కాకుండా సందర్శనల పేరిట రాజకీయాలు చేయడంపై విమర్శలు చేస్తున్నారు.
ఇది కూడా చదవండి..: Cases on Farmers | రైతులపై అక్రమ కేసులు.. కేటీఆర్ ఆగ్రహం
