అక్షరటుడే, వెబ్డెస్క్: Konda Surekha | మాజీ మంత్రి కొండా సురేఖ కీలక ప్రకటన చేశారు. నిరీక్షణ ముగిసింది.. త్వరలో కీలక నిర్ణయాన్ని ప్రకటిస్తా అని ఆమె పేర్కొన్నారు. ఈ మేరకు సోషల్ మీడియాలో పోస్ట్ చేశారు.
కొండా సురేఖను గురువారం మంత్రి పదవి నుంచి బర్తరఫ్ చేసిన విషయం తెలిసిందే. ఆమెను తొలగించడంతో పాటు ఆ శాఖలను సీఎంకు కేటాయించారు. తన తొలగింపుపై ఇప్పటికే ఆమె స్పందించారు. అన్యాయంగా పదవి నుంచి తప్పించారని, తన వివరణ తీసుకోలేదని ఆవేదన వ్యక్తం చేశారు. ఈ క్రమంలో తాజాగా సోషల్ మీడియా (Social Media) వేదికగా.. నిరీక్షణ ముగిసిందని ప్రకటించడం గమనార్హం.
Konda Surekha | పార్టీ మారుతారా..
కొండా సురేఖ తన బర్తరఫ్ అనంతరం మాట్లాడుతూ.. తాను ఎక్కడికి వెళ్లడం లేదని కాంగ్రెస్లోనే ఉంటానని స్పష్టం చేశారు. అయితే తాజాగా త్వరలో కీలక నిర్ణయం వెల్లడిస్తానని ప్రకటించడం వెనుక ఆంతర్యం ఏమిటని పలువురు చర్చించుకుంటున్నారు. ప్రస్తుతం ఆమె కాంగ్రెస్ను వీడి ఇతర పార్టీలో చేరుతారా అనే చర్చ జరుగుతోంది. బీజేపీలో చేరుతారని గతంలో ప్రచారం జరిగినా.. ఆమె స్పందించలేదు. ఆమె కాంగ్రెస్కు రాజీనామా చేసి బీఆర్ఎస్ లేదా బీజేపీలోకి వెళ్తారా అనేది చూడాల్సి ఉంది.
Konda Surekha | పదవికి రాజీనామా చేయాలి
కొండా సురేఖ ఒక వేళ పార్టీ మారితే తన ఎమ్మెల్యే పదవికి కూడా రాజీనామా చేయాల్సి ఉంటుంది. ఎందుకంటే ఆమెను పార్టీ నుంచి సస్పెండ్ చేయలేదు. దీంతో ఇతర పార్టీలోకి చేరితే వేటు వేసే అవకాశం ఉంది. అలా చేయకుండా ఆమె రాజీనామా చేసి.. పార్టీ మారితే ఎలాంటి ఇబ్బందులు ఉండవు. అయితే ఎమ్మెల్యేగా ఆమె పదవి కాలం రెండేళ్లకు పైగా ఉంది. ఈ సమయంలో రాజీనామా చేసి ఉప ఎన్నికలకు వెళ్తే ఎలా అని ఆమె ఆలోచిస్తున్నట్లు సమాచారం.
Konda Surekha | గెలుపు కష్టమే..
ప్రస్తుతం ఉమ్మడి వరంగల్ జిల్లాలో ఎమ్మెల్యేలు, కీలక నేతలు కొండా కుటుంబానికి దూరం అయ్యారు. పార్టీ, ప్రభుత్వ పదవులు అనుభవిస్తున్న ఆమె అనుచరులు సైతం సైలెంట్గా ఉన్నారు. ఏమైనా మాట్లాడితే తమ పదవులు పోతాయేమోనని ఆందోళన చెందుతున్నారు. ఈ సమయంలో ఆమె రాజీనామా చేసి ఉప ఎన్నికలకు వెళ్తే గెలవడం కష్టమనే అభిప్రాయం వ్యక్తం అవుతోంది. ఈ క్రమంలో ఆమె ఏం నిర్ణయం తీసుకుంటారనేది త్వరలో తెలియనుంది.
ఇది కూడా చదవండి..: Gig workers Telangana | గిగ్వర్కర్ల సమస్యలు పరిష్కరిస్తాం : మంత్రి పొన్నం
