Apache Helicopter Crash | హర్మూజ్ వద్ద కూలిన అమెరికా అపాచీ యుద్ధ హెలికాప్టర్.. ఇది ఇరాన్ పనేనా?

అక్షరటుడే వెబ్‌డెస్క్: Apache Helicopter Crash | అంతర్జాతీయంగా తీవ్ర ఉద్రిక్తతలు నెలకొన్న హర్మూజ్ జలసంధి సమీపంలో అమెరికాకు చెందిన ‘అపాచీ’ సైనిక హెలికాప్టర్ ( Apache Helicopter ) కుప్పకూలింది. ఈ ప్రమాదంలో హెలికాప్టర్ పూర్తిగా దెబ్బతిన్నప్పటికీ.. అందులోని ఇద్దరు పైలట్లు సురక్షితంగా ప్రాణాలతో బయటపడ్డారు. ఈ విషయాన్ని అమెరికా అధ్యక్షుడు డొనాల్డ్ ట్రంప్ స్వయంగా ధృవీకరించారు. హర్మూజ్ జలసంధిపై ఇరాన్ విధించిన ఆంక్షలను, దిగ్బంధనాన్ని ఛేదించేందుకు అమెరికాకు చెందిన యూఎస్ సెంట్రల్ కమాండ్ (సెంట్‌కామ్) అక్కడ పహారా కాస్తోంది. అపాచీ హెలికాప్టర్లు, ఫైటర్ జెట్లు, డ్రోన్లతో అమెరికా దళాలు నిఘా పెట్టిన సమయంలోనే ఈ ప్రమాదం చోటుచేసుకుంది.

Apache Helicopter Crash | ఇరాన్ దాడులా? సాంకేతిక లోపమా?

అయితే, ఇదే సమయంలో అమెరికాకు చెందిన రీపర్ డ్రోన్లను తాము కూల్చివేసినట్లు ఇరాన్ సైన్యం ప్రకటించింది. దీంతో ఈ అపాచీ హెలికాప్టర్ ఇరాన్ జరిపిన కాల్పుల వల్ల కూలిపోయిందా? లేక ఏదైనా సాంకేతిక లోపం వల్ల ప్రమాదానికి గురైందా? అనే కోణంలో అమెరికా రక్షణ శాఖ అధికారులు దర్యాప్తు ప్రారంభించారు. ఈ సంవత్సరం ఫిబ్రవరిలో అమెరికా-ఇరాన్ మధ్య ఘర్షణలు మొదలైనప్పటి నుంచి యూఎస్ సైన్యానికి చెందిన హెలికాప్టర్ ఒకటి కూలిపోవడం ఇదే మొదటిసారి.

Apache Helicopter Crash | ఇరాన్ సైన్యం పూర్తిగా బలహీనపడింది..

అమెరికా, ఇజ్రాయెల్ దళాలు సంయుక్తంగా జరిపిన దాడుల వల్ల ఇరాన్ సైన్యం తీవ్రంగా నష్టపోయిందని అధ్యక్షుడు ట్రంప్ వ్యాఖ్యానించారు. ప్రస్తుతం ఇరాన్ రాజధాని టెహ్రాన్ వద్ద కేవలం 21 శాతం క్షిపణి సామర్థ్యం మాత్రమే మిగిలి ఉందన్నారు. ఇరాన్ గనుక మళ్లీ దాడులకు దిగితే గట్టి బుద్ధి చెప్పడానికి అమెరికా సైన్యం సర్వసన్నద్ధంగా ఉందని ఆయన హెచ్చరించారు.

Apache Helicopter Crash | అమెరికాకూ భారీ నష్టం..

మరోవైపు ఇరాన్‌తో జరుగుతున్న ఈ యుద్ధంలో తమ సైన్యం కూడా భారీ మూల్యాన్నే చెల్లించుకుందని యూఎస్ సెంట్రల్ కమాండ్ వెల్లడించింది. ఇరాన్ దాడుల కారణంగా ఇప్పటివరకు 13 మంది అమెరికా సైనికులు ప్రాణాలు కోల్పోగా, 399 మంది గాయపడినట్లు అధికారికంగా ప్రకటించింది. వీటితో పాటు అమెరికాకు చెందిన కొన్ని యుద్ధ విమానాలు కూడా ఈ ఘర్షణల్లో కూలిపోయాయని సెంట్‌కామ్ స్పష్టం చేసింది. ఇదే సందర్భంలో ఇజ్రాయెల్ ప్రధాని బెంజమిన్ నెతన్యాహును ఉద్దేశించి ట్రంప్ వ్యాఖ్యానిస్తూ.. ఒంటరిగా మిగిలిపోయే పరిస్థితి తెచ్చుకోవద్దంటూ హెచ్చరించడం అంతర్జాతీయంగా ప్రాధాన్యత సంతరించుకుంది.

ఇది కూడా చదవండి: Interlink Power Supply | ఇంటర్​లింక్​ వ్యవస్థతో నిరంతరాయంగా విద్యుత్​ సరఫరా: ట్రాన్స్​కో ఎస్​ఈ