అక్షరటుడే, కామారెడ్డి: Cannabis Smuggling | గంజాయి అక్రమ రవాణాపై కామారెడ్డి పోలీసులు ఉక్కుపాదం మోపుతున్నారు. గంజాయి అక్రమ రవాణాకు పాల్పడుతున్న ముగ్గురిపై పీడీయాక్ట్ నమోదు చేశారు.
Cannabis Smuggling | పనసపండ్ల చాటున గంజాయి..
పనసపండ్ల మాటున రూ.1.93 కోట్ల విలువైన 387.128 కిలోల గంజాయి తరలిస్తున్న కేసులో మరో ముగ్గురు నిందితులపై పీడీ యాక్ట్ కింద నిర్బంధ ఉత్తర్వులు జారీ చేశారు. దీంతో ఈ కేసులో ఇప్పటివరకు పీడీ యాక్ట్ కింద చర్యలు తీసుకున్న వారి సంఖ్య ఏడుకు చేరింది. గత జూన్ 20న ఒడిశా నుంచి మహారాష్ట్రలోని నాసిక్కు గంజాయి తరలిస్తున్నట్లు సమాచారం రావడంతో ఎస్పీ రాజేష్ చంద్ర (SP Rajesh Chandra) ఆదేశాలతో పోలీసులు జాతీయ రహదారి 44పై తనిఖీలు చేపట్టారు. క్యాసంపల్లి శివారులోని రాయల్ దాబా సమీపంలో అనుమానాస్పదంగా ఉన్న అశోక్ లేలాండ్ వాహనాన్ని తనిఖీ చేయగా పనసపండ్ల కింద సంచుల్లో దాచిన 387 కిలోల గంజాయిని గుర్తించి స్వాధీనం చేసుకున్నారు. దీని విలువ సుమారు రూ.1,93,56,400గా తేలింది.
Cannabis Smuggling | ఇందల్వాయి మండలం తిర్మన్పల్లి..
తాజాగా పీడీ యాక్ట్ నమోదు చేసిన వారిని నిజామాబాద్ జిల్లా ఇందల్వాయి మండలం తిర్మన్ పల్లి గ్రామానికి చెందిన షేక్ కరీముల్లా అలియాస్ షేక్ కరీం, గైని సుభాష్, షేక్ రహీమ్లుగా పోలీసులు గుర్తించారు. ఈ సందర్భంగా ఎస్పీ రాజేష్ చంద్ర మాట్లాడుతూ మాదకద్రవ్యాల అక్రమ రవాణా యువత భవిష్యత్తును నాశనం చేస్తుందని, అలాంటి వారిని ఎట్టి పరిస్థితుల్లోనూ ఉపేక్షించబోమని హెచ్చరించారు. జిల్లాలో డ్రగ్స్ అరికట్టేందుకు ప్రత్యేక నిఘా, వాహన తనిఖీలు కొనసాగుతున్నాయని తెలిపారు. గంజాయి, ఇతర మాదకద్రవ్యాలకు సంబంధించిన సమాచారం తెలిస్తే వెంటనే సమీప పోలీస్ స్టేషన్ లేదా డయల్ 112కు తెలియజేయాలని, సమాచారం ఇచ్చిన వారి వివరాలు గోప్యంగా ఉంచుతామని సూచించారు.
ఇది కూడా చదవండి..: PETA President Election | పెటా అధ్యక్షుడిగా డాక్టర్ అబ్బాపూర్ రవీందర్
