అక్షరటుడే వెబ్డెస్క్: Kavitha Law and Order | తెలంగాణలో రేవంత్ రెడ్డి పాలనలో శాంతిభద్రతలు పూర్తిగా గాడి తప్పాయని తెలంగాణ రక్షణ సేన అధినేత, మాజీ ఎమ్మెల్సీ కవిత ( Kavitha ) ఆందోళన వ్యక్తం చేశారు. రాష్ట్రంలో మహిళలు, బాలికలకు భద్రత కరువైందని, నిత్యం దాడులు, అత్యాచార ఘటనలు చోటుచేసుకోవడం ప్రభుత్వ వైఫల్యానికి నిదర్శనమని ఆమె విమర్శించారు.
Kavitha Law and Order | ఖమ్మం ఘటన..
ఖమ్మం నగరంలో 12 ఏళ్ల బాలికపై అఘాయిత్యానికి పాల్పడి, ఆపై నాలుగో అంతస్తు నుంచి కిందకు తోసేసిన ఘటన అత్యంత దారుణమని, ఇది అందరినీ కలచివేసిందని అన్నారు. జిల్లా కేంద్రానికే ఇలాంటి పరిస్థితి ఉంటే, ఇక మారుమూల ప్రాంతాల పరిస్థితి ఏంటని ఆమె ప్రశ్నించారు. ఈ కేసులో పోలీసులు వేగంగా దర్యాప్తు జరిపి, నిందితుడిని కఠినంగా శిక్షించాలని డిమాండ్ చేశారు.
Kavitha Law and Order | మల్కాజ్గిరి ఘటన
హైదరాబాద్ మల్కాజ్గిరిలో భార్యను తుపాకీతో కాల్చి చంపిన ఘటనపై ఆమె స్పందించారు. మూడు నెలల క్రితమే సదరు వ్యక్తి బహిరంగంగా తుపాకీ ప్రదర్శిస్తూ బెదిరింపులకు పాల్పడినప్పుడే పోలీసులు చర్యలు తీసుకుంటే, ఈరోజు ప్రాణనష్టం జరిగి ఉండేది కాదని అభిప్రాయపడ్డారు. పోలీసుల నిర్లక్ష్యంపై ఆమె అసహనం వ్యక్తం చేశారు. రాష్ట్రంలో పాలనపై పట్టు లేకపోవడం వల్లే నేరాలు పెరిగిపోతున్నాయని కవిత ఆరోపించారు. మల్కాజిగిరి ఘటనకు ప్రభుత్వమే నైతిక బాధ్యత వహించాలని, నిందితుడిని వెంటనే అరెస్ట్ చేసి కఠినంగా శిక్షించాలని ఆమె డిమాండ్ చేశారు.
ఇది కూడా చదవండి: Mohan Naik Arrest | ఆర్అండ్బీ ఈఎన్సీ మోహన్ నాయక్కు 14 రోజుల రిమాండ్
