అక్షరటుడే, కామారెడ్డి: Kamareddy Collector Fake IDs | సోషల్ మీడియా సైబర్ నేరగాళ్లకు వేదికగా మారింది. ఈ వేదికగా అమాయక ప్రజలతో పాటు అధికారులు, రాజకీయ నాయకులను సైబర్ ఉచ్చులోకి లాగుతున్నారు. ఇటీవల సోషల్ మీడియా ప్లాట్ఫార్మ్ లో ఫేక్ ఐడీలతో అకౌంట్స్ క్రియేట్ చేసి సైబర్ నేరాలకు పాల్పడుతున్నారు.
Kamareddy Collector Fake IDs | కామారెడ్డి కలెక్టర్ పేరిట
తాజాగా కామారెడ్డి కలెక్టర్ ఆశిష్ సంగ్వాన్ (Collector Ashish Sangwan) పేరు మీద ఫేక్ ఐడీలను సృష్టించారు. వాట్సాప్, ఇన్ స్టాగ్రామ్లలో ఫేక్ ఐడీలు సృష్టించి వైరల్ చేస్తున్న విషయాన్ని కలెక్టర్ గ్రహించారు. నష్టం జరగకముందే స్పందించిన ఆయన వెంటనే దేవునిపల్లి పోలీసులకు రాతపూర్వకంగా ఫిర్యాదు చేసినట్టుగా తెలుస్తోంది. కలెక్టర్ ఫిర్యాదుపై కేసు నమోదు చేసిన పోలీసులు ఫేక్ ఐడీ క్రియేట్ చేసిన వారి వివరాలు గుర్తించే పనిలో పడ్డారు. ఈ ఫేక్ ఐడీల ద్వారా కలెక్టర్ పేరు చెప్పి పలువురికి మెసేజ్లు పెట్టి డబ్బు డిమాండ్ చేసే అవకాశం ఉందని పోలీసులు అనుమానిస్తున్నారు. సాధారణంగా సైబర్ నేరగాళ్లు అధికారుల పేర్లతో ఫేక్ ఐడీలు సృష్టించి, వారి సన్నిహితులకు, ఉద్యోగులకు మెసేజ్ లు పంపి డబ్బు వసూలు చేయడం, వ్యక్తిగత సమాచారం సేకరించడం చేస్తుంటారని పోలీసులు చెబుతున్నారు. కలెక్టర్ విషయంలోనూ అదే జరిగే అవకాశం ఉండటంతో ఆయన ముందుగానే స్పందించడం సరైన నిర్ణయమని పోలీసు వర్గాలు అంటున్నాయి.
Kamareddy Collector Fake IDs | గతంలోను అధికారుల పేర్లతో..
సోషల్ మీడియాలో అధికారుల ఫొటోలు, పేర్లు వాడి ఫేక్ ఐడీలు సృష్టించడం ఇదే మొదటిసారి కాదు. గతంలోనూ జిల్లాలో పలువురు రాజకీయ నాయకులు, అధికారుల పేరిట ఇలాంటి ఫేక్ ఐడీలు సృష్టించి మోసాలకు పాల్పడిన ఘటనలు జరిగాయి. సైబర్ నేరగాళ్లు మొదట అధికారి అధికారిక అకౌంట్ నుంచి ఫోటోలు, సమాచారం సేకరించి, ఆ తర్వాత ఫేక్ అకౌంట్ క్రియేట్ చేసి, వారి పరిచయస్తులకు ఫ్రెండ్ రిక్వెస్టులు పంపుతారు. కొందరు అమాయక ప్రజలు అదే అధికారి అకౌంట్ అని నమ్మి మెసేజ్లకు స్పందిస్తారు. ఆ తర్వాత డబ్బు అడగడం, ఓటీపీలు అడగడం, లింకులు పంపడం ద్వారా మోసానికి పాల్పడుతారు. ఈ విషయంలో కలెక్టర్ ముందస్తుగా ఫిర్యాదు చేయడంతో పెద్ద నష్టం జరగకుండా ఆగిపోయిందని చెప్పవచ్చు. కలెక్టర్ ఫిర్యాదు చేయడంతో పాటు ప్రజలను కూడా అప్రమత్తం చేశారు.
ఇది కూడా చదవండి..: Perini Natyam | పేరిణి నృత్య ఘట్టం..ఉత్సాహంగా నాట్య పరీక్షలు!
